II CONCURSU DE VIDEOCLIPS MEDIU GÜEYU
BASES
OXETIVOS
Promover la realización de videoclips nel mediu rural. Ayudar a dar a conocer proyectos audiovisuales nuevos.
¿QUIÉN PUE PRESENTASE?
Persones que tean desarrollando’l so llabor n’España nel campu de la realización audiovisual. Trabayos independientes, non vinculaos a productores o distribuidores grandes.
REQUISITOS QU’HA CUMPLIR EL VÍDEOCLIP
Los videoclips presentaos pueden tar grabaos con cualquier dispositivu (teléfonos móviles, cámares de cualquier tipu dixitales o analóxiques…), non afectando a la puntuación los medios técnicos usaos. Otra manera, va poder utilizase cualquier técnica: imáxenes de videu, fotografía, animación d’ilustración o collage, xeneración d’imáxenes con medios dixitales.
Los videoclips nun tienen por qué ser inéditos, pero sí realizaos a partir de 2023, incluyío. Pueden tener premios d’otros certámenes anteriores.
Los videclips han tar grabaos nel mediu rural del territoriu español.
Cada participante pue presentar hasta 2 videoclips.
PREMIOS
Premiu al Meyor Videoclip: 500 € y esculturina molona.
Accésit a la Meyor Canción: Esculturina molona.
Accésit al Meyor Montaxe: Esculturina molona.
Accésit al Meyor Vestuario y maquillaxe: Esculturina molona.
Accésit a la Meyor Fotografía: Esculturina molona.
Los premios van poder declarase ermos si’l xuráu asina lo considera. Otra manera, van poder axudicase Menciones Especiales u otros accésit si’l Xuráu lo determina.
FUERA DE CONCURSU
Tamién pueden presentase videoclips qu’anque nun cumplan dalgún de los requisitos se consideren afayadizos pa proyectalos nel Festival. Nun van optar a los premios pero proyectaránse’l día de la Gala si’l Xuráu lo considera oportuno pol so interés.
VALORACIÓN
Valoraráse la orixinalidá de la propuesta, la execución técnica y l’acercamientu a la cultura rural.
MOU DE PRESENTACIÓN
Subir el videoclip a Vimeo o similar y unviar l’enllaz a mediugueyu@gmail.com xunto cola ficha técnica. Na ficha técnica ha figurar el títulu de la canción, nome del grupu o solista, creitos (quién participó na creación del videoclip y en qúe aspectu d’él, fecha y sitiu de grabación y edición, amás de cualquier otru datu que les persones participantes consideren relevante. Ha axuntase tamién semeya de la persona autora de la realización del videoclip, de la banda o solista y los enllaces a les webs o redes sociales, de cara a dar publicidá a los videoclips nominaos y premiaos.
PLAZOS
El plazu presentación acaba’l 7 d´ochobre de 2025 a les 23:59h.
El 21 d’ochobre van dase a conocer los videos escoyíos.
Los videoclips escoyíos van proyectase na XIV edición del festival.
Na Gala del 24 d’ochobre van dase a conocer los videoclips ganadores
XURÁU
El xuráu va tar compuestu por profesionales del mundu de la cultura audiovisual y va ser anónimu hasta’l día’l fallu, que va ser inapellable.
Va haber una mención especial del Públicu, que va ser decidida pol públicu asistente que visione tolos videoclips escoyíos y vote’l día de la gala.
DERECHOS
Les persones participantes comprométense a tener los derechos d’autor de les obres que presenten, tanto de la música como de les imáxenes.
Mediu Güeyu va poder difundir los videoclips escoyíos per internet, prensa y nel propiu Festival, les veces que considere necesario, citando l’autoría.
La participación nel concursu supón l’aceptación d’estes bases.
